خمیس 20  سيپٽمبر 2018ع

صوبا نصاب جي تياري ۾ وفاقي حڪومت جي پيروي ڪن: وزيراعظم شاهد خاقان عباسي

ويب ڊيسڪ: اسلام آباد: وزيراعظم شاهد خاقان عباسي چيو آهي ته وفاقي حڪومت شاگردن کي جديد نصاب ۽ معياري تعليم جي فراهمي جي ذريعي ملڪ ۾ اعليٰ تعليمي معيار مقرر ڪيا آهن، صوبا به ان جي پيروي ڪن، هن اها ڳالهه تعليم ۽ پيشيوراڻي تربيت واري وفاقي وزارت جي طرفان نئين نصاب ۽ درسي ڪتاب جاري ڪرڻ جي تقريب کي خطاب ڪندي چئي جيڪا سومر ڏينهن وزيراعظم آفيس ۾ منعقد ٿي. وزيراعظم چيو ته ڪو به ملڪ پنهنجي نوجوانن کي معياري تعليم جي فراهمي تي ڌيان ڏيڻ کانسواءِ ترقي نٿو ڪري سگهي، وفاقي گادي واري شهر جو علائقو تعليم جي معيار بلند ڪرڻ جي لاءِ ٻين صوبن جي لاءِ ماڊل جي طور تي ڪم ڪندو. وزيراعظم نيشنل ٽيسٽنگ سروس جي قيام جي ضرورت تي به زور ڏنو ته جيئن سڄي ملڪ جي مختلف تعليمي بورڊز جي طرفان ڏنل تعليم جي سطح جي معياربندي ڪري سگهجي. وزيراعظم چيو ته هن وقت صوبن جي طرفان جن مختلف معيارن جي پيروي ڪئي پئي وڃي ان جي جاچڻ مشڪل آهي، اميد آهي ته ايندڙ حڪومت ان چئلينج کي منهن ڏيندي، ان کان اڳ وزيراعظم وفاقي گادي واري شهر جي اسڪولن جي لاءِ نئين نصاب ۽ درسي ڪتاب جاري ڪيا. پهرين مرحلي ۾ پهرين جماعت کان پنجين جماعت تائين ڪتابن کي اپ گريڊ ڪيو ويو آهي جنهن کانپوءِ ٻي مرحلي ۾ ڇهين کان اٺين تائين ڪتابن کي اپ گريڊ ڪيو ويندو جڏهن ته ٽئين ۽ آخري مرحلي ۾ نائين کان ٻارهين ڪلاس تائين ڪتابن کي بهتر بڻايو ويندو، هن چيو ته 18 هين ترميم کانپوءِ تعليم جو شعبو هاڻي صوبن ڏانهن هليو ويو آهي، صوبن وٽ وڏي بجيٽ موجود آهي ۽ ان سان گڏوگڏ انهن تي وڏي ذميداري به لاڳو ٿئي ٿي، وزيراعظم کنيل قدمن تي وفاقي تعليم واري وزارت کي ساراهيندي چيو ته تعليم جي معيار کي وڌائڻ جي لاءِ استادن جي تربيت کي به بهتر بڻائڻ جي ضرورت آهي، هن چيو ته هن وقت حڪومت سرڪاري اسڪولن ۾ هر طالب علم تي 5 هزار روپيا في ڪس خرچ ڪري رهي آهي تنهن هوندي به ان ڳالهه تي افسوس جو اظهار ڪيو ته پوءِ به نتيجا اطمينان بخش نه آهن، هن چيو ته ان جي ابتڙ نجي اسڪول گهٽ خرچ ڪري بهتر نتيجا حاصل ڪري رهيون آهن، هن چيو ته نجي شعبو سمورن صوبن خاص طور تي پنجاب ۾ نمايان ڪردار ادا ڪري رهيو آهي، وزيراعظم چيو ته جڏهن هو سياست ۾ آيو هو ته وفاقي ڪابينا ۾ صرف ڪجهه گريجويئٽس هوندا هئا تنهن هوندي به اڄ حالتون مختلف آهن ۽ ڪابينا ۽ پارليامينٽ ۾ پي ايڇ ڊيز، انجنيئرز ۽ پوسٽ گريجوئيٽس سان گڏوگڏ مدرسن جا سند يافته ماڻهو به موجود آهن، هن چيو ته اعليٰ تعليم سان معاملن ۾ بهتري ايندي آهي، تقريب ۾ پيشيوراڻي تعليم ۽ فني تربيت واري وفاقي وزير انجنيئر بليغ الرحمان ۽ تعليم وارو سيڪريٽري اڪبر حسين دراني به موجود هئا، وزيراعظم شاهد خاقان عباسي ”وزيراعظم جي 100/100/100 ايجوڪيشن پروگرام“ جو به افتتاح ڪيو جنهن جو مقصد وفاقي علائقي ۾ 100 سيڪڙو داخلا، 100 سيڪڙو تعليمي تڪميل ۽ 100 سيڪڙو خواندگي کي يقيني بڻائڻ آهي. هن اميد ظاهر ڪئي ته ٻين صوبا به ان قدم جي پيروي ڪندا.